Gipatin-aw ni Umandam nga ang mga distabilisasyon nga kampanya sa mga kritiko ni Presidente Gloria Macapagal-Arroyo mitukbil sa kuwerpo sa militar aron lang madasig ang ilang kawsa batok sa gobiyerno.
Apan gipasabot ni Umandam nga silang mga sundawo, dili mag-apil-apil sa dagan sa politika sanglit alang kanila naay mga politiko nga maoy responsable niini.
Ang mga sundawo may kaugalingong baroganan ug ang katungdanan nila mao ang pagbantay sa seguridad sa nasud ilabi na kon may manamastamas nga rebelde nga gikan sa sulod o kaha sa gawas sa nasud.
Apan bahin sa kasamtangang krisis politikanhon, si Umandam nagkanayon nga nagpabiling lig-on ang baroganan sa mga sundawo nga motahod sa batakang balaod ug sa mandato nga gitahas kanila.
Kon may mga tabi-tabi man nga kuno nagkabahinbahin ang militar ug malagmit mahitabo na usab ang kudeta, si Umandam mipasalig sa tanang katawhan sa Kabisay-an nga walay kamatuoran ang tanan.
Kon may suliran man ang mga sundawo sa Armed Forces of the Philippines walay lain, gawas sa internal ug kumon nga problema nga mao ang bahin sa "logistics".
Kining krisis sa kakuwang sa suweldo maoy gisagubang sa tanan karon ug ingon ra usab niini ang gibati sa mga sundawo, matud pa sa tigpamaba sa Centcom.