Tinun-an patay nang naglutaw

Patay na nga napalgan kagahapon sa buntag ang usa ka tinun-an sa grade five sa Maghaway Elementary School diha sa sapa sa Mananga dapit sa barangay Lagtang dakbayan sa Talisay.

Ang biktima mao si Ervin Quiroben kinsa ang patay'ng lawas niini napalgan sa mga residente sa maong lugar nga naglutaw sa sapa ug miburot na kini.

Base sa taho nga si Quiroben kuyog sa laing mga estudyante sa nahisgutang tunghaan niadtong Lunes diin nangaligo kini sa sapa tungod kay walay klase.

Ang mga magtutudlo sa maong tunghaan nagpahigayon og practice og sayaw para sa ilang teachers night sa sunod semana.

Si Quiroben nabiyaan sa iyang mga kauban dihang nanagan kini pahilayo sa lugar tungod sa usa ka kusog nga bul-og sa tubig.