Gibutyag ni Konsehal Augustus Pe Jr. nga gimando ni Mayor Tomas Osmeña ang pagpaputol sa insentibo ni Supt. Hernan Lungayan sugod karung bulana human wala kini matagbaw sa gipakitang performance sa maong opisyal.
Gibutyag ni Pe nga giasikaso usab karon nila ang mando sa mayor nga irekomendar sa Police Regional Office (PRO-7) aron ipalabay og destino si Lungayan gawas dinhi sa dakbayan sa Sugbo.
Nasayran nga si Lungayan bag-ohay pang natudlong hepe sa Carbon Police Station human kini giparelibohan pagka hepe sa Mobile Patrol Group (MPG.)
Gimando ni Osmeña ang pagparelibo ni Lungayan sa MPG human sa nahitabong pagkamatay sa duha ka mga polis nga sakop sa Crime Suppression Unit (CSU) nga ubos sa superbisyon sa MPG human kini miresponde og alarma didto sa Nivel Hills, Lahug ning dakbayan niadtong miaging bulan.