Gimanduan ni City Administrator Bimbo Fernandez, ang City Attorney's Office nga maoy mohimo og imbestigasyon ning maong nagpadayong binuang diha sa City Hall.
Gipasalig ni Fernandez nga iyang ipaabot kining maong napublikar nga laing eskandalo sa paghibalik unya ni Mayor Tomas Osmeña dinhi sa Sugbo karong Biyernes aron kahimo-an og tukmang lakang ang mga kawani nga nalambigit niini.
Susihon pa ni Fernandez kun regular o ba kaswal nga kawani ang mga nalambigit ning maong binuang og kon masuta nga kaswal kini mahimong putlon nila ang kontrata, ug kon regular kini ipaubos nila sa imbestigasyon paghatag og due process.
Gipasalig sa city administrator dihang nahinabi sa Banat News nga mas bug-at nga silot ang ilang ipahamtang niadtong mga kawani nga ma-probahan nga kunsabo sa maong binuang.
Kumbinsido ang city administrator nga dunay mga kawani diha sa business permit section nga nalambigit niini.
Gipasalig ni Fernandez nga ila kining gihingusgan nga madiskubrihan ug masumpo gumikan kay babag kini sa mga programa nga gipatuman sa mayor nga gitumong aron pagpalig-on sa panerbisyo sa publiko.
Aron mas molig-on ang ilang imbestigasyon ning maong anomaliya nanawagan si Fernandez ngadto sa uban pang mga nabiktima sa maong binuang ilabi na sa mga kawani sa City Hall nga nagsilbing fixer nga mosumbong sa buhatan sa mayor sa ikawalong andana sa Annex building sa City Hall aron ma-aksiyonan dayon.
Napublikar kining maong binuang human mireklamo ang usa ka konsehal sa barangay Pasil nga si Leon Dakay nga nanag-iya og sari-sari store human gipadad-an og notice gikan sa CTO nga nagmando sa paghilot sa P25 mil nga bayranan sa business permit gikan niadtong tuig 2002 hangtod karong tuiga.
Kini tungod kay gibutyag sa konsehal nga matag tuig siya nga nag-renew sa ilang business permit ug ang kawani sa City Sports Commission nga si Manolito Bomboy Ledesma maoy iyang gitumbok nga gihatagan niya sa kantidad matag tuig alang sa renewal apan nasuta niya nga wala diay kini i-remit.
Gawas kang Dakay apil sa nabiktima ning maong binuang ang konsehal sa barangay Suba nga si Butch Ledesma nga nakahatag usab og P10 mil alang sa paglukat ug business permit apan wala gihapon ma-remit.