Ex-convict sa Boljoon gipatay

Usa ka ex-convict nga gikan sa Muntinlupa gipusil-patay sa duha ka tawong luwan og motorsiklo didto sa Patrocinio corner San Pedro street, Barangay Poblacion lungsod sa Boljoon sa alas 5:00 sa kahaponon sa milabay'ng adlaw.

Duha ka samad sa iyang bukobuko ang hinungdan sa kamatayon sa biktima nga si Cerefino Goneda, 56 ang panuigon, ug molupyo sa Natalio Bacalso, barangay Poblacion sa naasoy'ng lungsod.

Suma pa ni SPO1 Roderick Roma sa Boljoon Police, samtang naglingkod kini nga nagtan-aw og duwa sa volleyball, kalit na lang kining gitira sa wala mailhing lalaki nga nagtaptap og bonnet.

Ang maong suspetsado miangkas sa usa ka itom nga motorsiklong walay plate number kuyog sa nailhang drayber nga si John Paul Coronel, ug sa uwahi kalma ra nga misutoy palayo sa nahisgutang dapit.