Ang biktima nga ilhon sa ngan nga Alma (apelyedo gipugngan),30, taga Barangay Lunop sa naasoy'ng lungsod midangop sa kapolisan ug mireklamong giamong-amongan siya sa iyang kanhi kapuyo nga si Anastacio Culagbang,35, molupyo sa maong dapit.
Sumala pa ni Alma namunit siya niadto og mga "dalag sa lumboy" kun mga tinagak nga layang dahon sa maong kahoy dihang gilipot siya sa suspek ug gipugos ang kaugalingon bisan supak sa iyang kabubut-on.
Ang suspek daling gisikop dihang wala niya damhang ipasikop siya sa iyang hinigugma maong nakatulog gyud kini sa bilangguan sulod sa usa ka gabii.
Nasuta nga ang duruha nagbuwag kaniadto tulo na ka tuig ang nakalabay ug sa dihang nag-ipon pa sila nakabaton sila og duha ka anak nga mao karon ang girason sa lalaki nga iyang pakaslan ang biktima. gumikan usab sa ilang mga anak.
Si Inspector Efren Delos Reyes, ang hepe sa Boljoon Police Station nagkanayon nga ilang gibuhian ang suspek kagahapon human makumbinsir ang biktima sa gisaad sa suspek.
Sumala pa ni Delos Reyes nga nagkabuwag ang duruha gumikan kay wala kauyuni sa inahan sa suspek ang biktima.
Apan sa pagkakaron gituohang wala nay makababag sa intensyon sa lalaki nga pakaslan ang iyang hinigugma sanglit dako ang posibilidad nga mabilanggo kini kun wala pa makumbinsir ang biktima.
Karong adlawa gikatakdang magpakasal ang duruha ug manumpa atubangan sa mayor sa Boljoon nga si Mayor Deogenes Derama.