Si SPO4 Romeo Hurboda, desk officer sa kapolisan sa Talisay, mihimo sa maong pasidaan human sa daghang mga reklamo nga ilang nadawat gikan sa mga Talisaynon kinsa nabiktima sa pagpangawat sa kaugalingon nilang katabang sa panimalay.
Giila ni Hurboda ang labing bag-ong biktima nga si Cristy Seriacay, 28, minyo, taga Cansojong, Talisay kinsa gikawatan og salapi ug uban pang butang sa iyang katabang sa panimalay.
Matud pa ni Hurboda nga ang giingong katabang, giila nga usa ka Charlene, hingkod, minyo, walay pihong adres.
Ang biktima mitug-an sa kapolisan nga duha pa lang ka adlaw nga nagtrabaho kanila ang suspetsado.
Apan niadtong Domingo sa alas 7:30 sa kagabhion, samtang nahibilin kining nag-inusara sa balay kay ang biktima bisi sa ilang tindahan, kalit lamang kining mikagiw dala ang P300 sa biktima nga diha sa iyang pitaka sa ilang lawak.
Matud pa ni Hurboda nga sa kaso nga ilang nadawat, walay mahimo ang kapolisan paggukod sa suspetsado tungod kay wala sila masayod kon taga diin kini.