Si Teresito Alburo, taga habagatang bahin sa lalawigan, nagkanayon nga gusto silang makighusay sa mga operator sa mga trak pasaheroan sa hukmanan.
Ingon usab niini gipalanog sa mga estudyante sa tulomanon sa estasyonan sa radyo sa kagamhanan nga makigharong sila sa mga operator sa hukmanan kon ipadayon nila ang pagputol sa ilang (estudyante) katungod sa diskuwento sa mga pletihan sa mga sakyanan.
Ang maong lakang sa mga senior citizen ug estudyante nahimo nunot sa nasabotan sa mga operators ug sa mga kadagkoan sa mga ahensya sa transportasyon nga ipatuman na sa Lunes ang gipa "rollback" nga pletihan.
Kini mahimo nang P5.50 sa unang lima ka kilometro ug P.85 sa matag mosunod nga kilometro.
Apan sa maong gipakubsang pletihan wala na nila ikonsiderar ang paghatag og diskuwento ngadto sa mga tiguwang ug mga estudyante sa katarongan nga naa na sa maong mga diskuwento nahilakip ang pribilihiyo nga gitugot sa kagamhanan ngadto sa mga senior citizen ug mga estudyante.
Si Alburo nagkanayon nga iya nang gipahikay sa iyang abogado ang tukmang kiha batok sa mga operators aron nga mag-atubang sila sa hukmanan.
Basi sa balaod ang mga estudyante ug senior citizen gihatagan og pribilihiyo nga makabaton og diskuwento sa mga pletihan sa mga sakyanang pasaheroan.
Bisan sa mga tambal nga ilang paliton sa mga tiguwang may katungod usab sa diskuwento niini.