Ang suspek giilang si Nam Jeung Back,43, minyo sa usa ka Cebuana ug kasamtangang nagpuyo sa naasoy'ng lugar, ang managtiayon nagnegosyo og mga fashion accessories nga pang-export.
Si SPO4 Raul Noynay sa pakighinabi sa Banat News mitug-an nga nahitabo ang paglugos niadto pang Miyerkules sa hapon samtang wala diha ang asawa sa suspek.Ang 17 anyos nga dalagitang katabang ug ang suspek lang ang nahibilin sa balay.
Sigun pa ni Noynay ang biktima kasamtangang nagpahulay sa iyang lawak sikbit sa masters bedroom sa iyang agalon dihang nanuktok kini sa bungbong. Nagtuo ang biktima nga dunay isugo maong migawas siya sa lawak.
Gikatahong nasugatan sa biktima ang iyang agalon diha sa agianan gawas na sa pultahan ug misenyas nga magpamasahe kini ngadto kaniya, apan gibalibaran kini niya ug misuway na unta siya pagsulod sa kuwarto dihang misunod ang suspek ug pugsanong gibitad pagawas ug gidala didto sa ilang lawak. Gumikan kay may gidak-ong 5'7 ug may gibug-atong gibana-banang 90 ka kilo ang suspek walay nahimo ang dalagita dihang pugsanong gipugos sa suspek ang kaugalingon ngadto kaniya.
Miangkon ang biktima nga wala hinuon siya hulgaa ug wala usab haylua og kwarta sa suspek.
Nianang pag-abot sa asawa sa suspek gikatahong gipangutana niini ang biktima kun nganong naa sa sulod sa ilang lawak ang tsinelas niini hinungdan nga napugos ang bata sa pagtug-an nga gibitad siya sa sulod ug gilugos sa suspek.
Gikatahong mihangyo lang unta ang bata nga dili lang moreklamo kay mopauli na lang kini sa ilang lungsod (dinhi ra sa lalawigan sa Sugbo) ug magpakahilom apan gidala ang biktima sa agalong babaye ngadto sa balay sa inahan niini ug gihatud dayon sa pink room sa Vicente Sotto Memorial Medical Center.
Positibo ang nahimong resulta sa paghiling sa mga doktor maong gikuyugan sa asawa sa suspek ang grupo ni SPO4 Noynay sa ilang balay ug gidakop ang Koreano, samtang ang bata naa na sa pag-amping sa mga sakop sa Department of Social Welfare and Development.