Si Drilon sa pakighinabi sa mga sakop sa media nagkanayon nga dili personalay ang pagbuwagsa Liberal Party sa kampo ni Arroyo kundili gumikan kini sa nakita sa ilang grupo nga nawad-an na og salig ang kadaghanan sa pangulo gumikan sa kapakyas niini nga mapatuman ang gipangitang reporma.
Ang maong gihulagway nga repormang gipangita matud pa ni Drilon mao untay makapahaw-as kang Arroyo sa gikahimutangan niini.
Si Arroyo nalubong karon sa pagsaway gumikan sa mga pasangil nga kini nanikas niadtong milabay'ng piniliay ug ingon man sa lubog nga isyu sa jueteng nga gipasangil nga nagdawat og bahin ang banay sa presidente.
Samtang gitawag sa Malacañang nga istupido ug dili katuohan ang pangangkon karon sa usa ka kanhi kawani sa Malacañang nga miingong nakakita gyud siya sa pagdunol og kwarta ni Arroyo ngadto sa mga Regional Directors sa Comelec pila ka adlaw una pa ang eleksyon sa 2004.
Si Presidential Political Adviser Gabriel Claudio nagkanayon nga daghang "buslot"ang istorya ni Michael Angelo Zuce alyas Louie kinsa kanhi Presidential Staff-4 ug kanhi sakop ni Presidential Assistant for Political Affairs Joey Rufino.
Matud pa ni Zuce migawas siya sa pagpakahilom gumikan sa mga hulgang nadawat sa iyang pamilya ug napugos sa pagtug-an sa iyang nahibaw-an.
Ang istorya ni Zuce konektado sa istorya usab ni jueteng witness Sandra Cam nga nag-ingong nidawat si Arroyo og kwarta gikan sa jueteng para isuhol sa mga Comelec Officials.