Nangita'g shabu giluba sa magsuon

Gidunggab sa tulo ka managsoon ang usa ka tawo nga ilang silingan sa sitio Mayna sa barangay Subangdaku, dakbayan sa Mandaue nga ang hinungdan mao ang nawagtang nga putos sa shabu.

Ang biktima mao si Christopher Saraum, 28 anyos, minyo ug nagpuyo sa maong dapit.

Ang mga suspetsado nga nagdunggab mao ang managsoon nga sila si Arnold, Melco ug Erwin Fuentenegra nga silingan sa biktima.

Sumala pa sa saksi nga kapuyo sa biktima nga kalit lang misaka sa ilang panimalay ang tulo ka suspetsado sa miaging gabii.

Nakaangkon og samad sa dughan, ilok ug tiyan si Saraum kinsa anaa karon sa Vicente Sotto Memorial Medical Center tungod sa grabe nga mga samad niining naangkon.

Hinuon, ang tulo ka managsoon nadakpan gilayon sa kapolisan nga mitubag sa maong alarma.

Nagpaabot na unta og taksi nga kasakyan ang tulo ka managsoon alang na unta sa ilang pagsibat.

Si PO2 Roy Telentino sa Subangdaku Police Station miingon nga alas 12 pasado sa miaging kaadlawon nagsugal ang managsuong Fuentenegra nga diha usab si Saraum.

Kalit lang nga nangita si Saraum sa usa ka putos nga shabu nga nahulog gikan sa kilid niini ug gipasanginlan ang managsuon.

Nasuko ang managsuon nga maoy hinungdan sa pagkuhag kutsilyo ug gidunggab ang biktima sa makadaghang higayon.