Calvin i-secure sa arraignment

Hugot nga seguridad maoy gipaabot nga ipatuman sa kapolisan ug sa mga sakop sa Cebu Provincial Detention and Rehabilitation Center ugmang adlawa sa pagdala sa gidudahang druglord nga si Calvin de Jesus Tan alang sa iyang arraigment sa korte.

Si Tan naa karon sa CPDRC ug dad-on ugmang adlawa sa sala ni Manduae City RTC Judge Marilyn Yap nga ubanan og daghang guwardiya gumikan sa kabalakang posibleng dunay moluwas kaniya.

Si Representative Antonio Cuenco mipadayag nga iyang gikabalak-ang mo-ikyas si Tan dinhi sanglit wala kini magsupak-supak sa mga gipasangil kaniya didto sa Hongkong ug bisan na ang pagsupak sa petisyon sa Pilipinas didto sa Hongkong nga dad-on siya dinhi sa nasud.

Ang kongresista nagkanayon nunot sa maong posibilidad sa pag-ikyas, dugang seguridad ang gikinahanglan bisan gani nga kini naa sa sulod sa CPDRC nga labing moderno ug hi-tech nga prisohan.

Si Mandaue City Police Office Director Sr.Supt. Pablo Florante Lamosao mitug-an sa Banat News nga duna na siya'y gitaganang sakop sa Special Weapons And Tactics(SWAT) nga paubanon sa mga sakop sa Philippine Drug Enforcement Agency (PDEA) ug mga jailguards sa CPDRC.

Ang MCPO maoy kanunay nga naghatag og dugang bantay matag dunay hearing ang onse ka mga gidudahang shabu manufacturers diha sa korte.