Matud pa ni Mayor Socrates Fernandez nga malagmit labi pa kining makapadako sa bangi karon sa Cebu City ug Talisay City.
Kini tungod kay gipiho sa taga barangay Manipis, Talisay City nga may 12 ektaryas pa kining luna nga sa pagkakaron nahisakop sa Sinsin.
Ang Sinsin usa sa mga bukirang barangay sa Cebu City, apan basi sa karaang survey nga gihuptan karon sa mga opisyal sa barangay Manipis 12 ektaryas niini gisakop sa Sinsin.
Maoy hinungdan nga ang konseho sa Manipis milig-on og resolusyon nga nagtugot kang Mayor Fernandez sa pagtukod og usa ka team nga mopahigayon og usa ka survey.
Alang kang Kapitan Ramil Manayon nga ang pagsurvey sa utlanan tali sa Manipis ug Sinsin maoy labing magtino sa kasigurohan nga ang Talisay may yuta pa nga sa pagkakaron nahisakop sa Cebu City sa dapit sa bukid.
Alang kang Fernandez nga kon mao kini mahitabo, ang Talisay City may singlonong yuta gikan sa dakbayan sa Sugbo sa dapit sa kadagatan diha sa South Reclamation Project (SRP) ug sa bukid, ang dapit sa Manipis.