Milandig sa usa ka pribadong tambalanan dinhi sa dakbayan ang biktimang si Wilbert Yap alyas Kim, ig-agaw ni Tuburan Mayor Rose Suezo, human nakaangkon og dakong samad sa ulo gumikan sa pagtigbas ni Zenaido Cagay, iyang suod nga higala ug silingan diha sa Barangay Dos.
Sigun pa ni PO3 Raul Jamiro sa Tuburan Police sinugdanan sa insidente mao ang pagduwa og "luthang" sa 10 anyos nga anak sa suspek nga nakaigo sa anak ni Yap.
Tungod niini gikasab-an ug gibunalan ni Cagay ang anak apan miinterbiner ang maguwang sa suspek nga gikasuko niini gumikan sa pagpanghilabot.
Mikuha og sundang si Cagay ug gigukod ang maguwang niini hangtud nga nakaagi sa gikahimutangan sa biktima kinsa mibadlong kaniya kay nagdala-dala og sundang.
"Nasuko man gud ang suspek nga giingnan siya sa biktima nganong madala-dala og sundang unya dili itigbas, busa ang biktima nuon maoy iyang gitigbas imbes ang igsuon," asoy pa ni Jamiro.
Nasuta usab sa kapolisan dihang mitahan si Cagay niadtong Sabado nga gisapot kini niadtong tungura gumikan kay wala kini sweldohi ni Mayor Suezo sa pagpamanday sa beach resort niini.