Tulisan gitionan sa sikyu

Wala maka-eskapo ang usa ka tulisang midunggab sa liog sa drayber nga iyang gitulis dihang gitionan sa shotgun sa guwardiyang nakakita sa hitabo diha sulod sa taxi sa may dalan B. Rodriguez ning dakbayan niadtong nakalabayng gabii.

Nabalhog sa karsel ang suspek nga si Bernabe Cutanag,18, taga Sitio Paliya Barangay Paknaan dakbayan sa Mandaue samtang ang iyang gidunggab mao si Marcelo Traya, 50, minyo ug taga Barangay Media Onse, dakbayan sa Toledo.

Matud pa sa Homicide Section ang suspek misakay sa taxi sa biktimang NJM Taxi nga may plakang GVR-180 diha sa barangay Paknaan dakbayan sa Mandaue ug nagpahatod sa dalan B.Rodriguez ning dakbayan.

Apan pag-abot diha sa atubangang bahin sa Vicente Sotto Memorial Medical Center kalit mition og siyam ka pulgadas nga kutsilyo si Cutanag sa liog ni Traya ug mideklarar og tulis .

Si Traya midumili unta sa paghatag sa iyang kinitaan apan kalit kining gidunggab sa suspek diha sa liog apan ang gwardiyang si Maximo Gapang kasamtangang nagbantay sa gate sa VSMMC nakakita sa insidente daling mitabang sa biktima.

Ang suspek sa dayon nang ikyas gitiunan og shotgun ni Gapang maong wala nalang kini mohinayon og dagan hinungdan sa pagkasikop niini ug nakuhaan sa kutsilyong gigamit pagdunggab kang Traya kinsa daling gisulod sa VSMMC ug gipatambalan ang liog niini.