Patay gumikan sa igo diha sa ulo ang biktimang si Esterlita Asentista,41 , biyuda samtang samaran usab sa iyang nawong ang kauban niining si Michael Abong, 28, ulitawo pulos mga gwardiya sa usa ka dakong department store diha sa North Reclamation Area ug parehong nagpuyo sa usa ka balay sa naasoy'ng lugar.
Sigun pa ni SPO2 Rey Cuyos sa Homicide Section sa pakighinabi sa Banat News padulong na pauli ang duruha gikan sa trabaho dihang kalit nga mibutho ang wala mailhing lalaki diha sa ngitngit nga bahin sa ilang lugar dayon walay daghang pangutana kalit silang gipamusil.
Unang nahagba si Asentista gumikan sa igo diha sa iyang ulo nga milapos sa iyang walang apapangig apan sa pagdagan ni Abong naigo usab kini diha sa tuong aping.
Human sa insidente daling miikyas ang gikatahapan samtang milandig sa Cebu City Medical Center ang samaran nga si Abong.
Si Cuyos nagkanayon ang uyab sa namatay nga biyuda nga giilang si Prescillano Basera molupyo sa Sitio Peace Valley sa naasoy'ng barangay gipailawom usab sa paraffin test aron masuta kun wala ba kini kalambigitan sa hitabo.
Si Cuyos nagkanayon nga ang mga biktima nagpuyo sa usa ka balay diin nagbahin sila sa bayrunon sa abangan niini, mismong mga silingan sa mga biktima mitug-an nga walay gikaaway ang duruha.