Si SPO1 Antonio Resquites, desk officer sa Oslob Police Station mibutyag sa Banat News nga ila gipahimutang si Filomino Rodriguez ubos sa gitawag nga "police custody" ug wala gyud idetiner sulod sa karsel.
Sa sayo pa may mga report nga giunay pagpatay pinaagi sa pagkolata ni Rodriguez ang iyang anak dalaga nga si Ma. Angela Rodriguez, 19 dihang nasakpan kini sa akto nga nakighilawas sa uyab sulod sa ilang balay sa barangay Mainit, Oslob niadtong Huwebes.
Si Resquites nagkanayon nga dihang ilang gisusi ang hitabo, naabtan sa kapolisan ang lawas patay sa biktima sa panimalay sa suspetsado apan wala kini samad ug bun-og.
Dihang gidala sa barangay tanod ang suspetsado ngadto sa kustodiya sa kapolisan, nanghimakak usab kini sa pasangil, hinungdan nga wala kapasaka og kaso ang kapolisan batok kaniya.
Mitug-an si Resquites nga buwag ang suspetsado ug ang asawa niini sulod sa pipila na ka tuig.
Sa pagkakaron, wala pay resulta sa awtopsiya nga gihimo sa mga tinugyanan sa National Bureau of Investigation NBI ngadto sa lawas sa biktima.
Hinuon matud pa ni Resquites nga gipaabot pa nila ang resulta sa awtopsiya ug unya na sila mohimo og hingpit nga lakang batok sa suspetsado sa higayong mamatud-an nga gipatay pag-unay niini ang iyang kaugalingong anak pinaagi sa pagkulata.
Midugang si Resquites nga wala sa sulod sa prisohan ang suspetsado tungod kay kon ila kining gitanggong nga wala pay kiha, sila usab ang maalaot.
Apan mipasalig ang suspetsado nga andam siyang moatubang sa imbestigasyon.q