"Kinahanglan gyud sila ma-transfer so that mawala na ang pagduda nga dunay mahitabong whitewash sa kaso and at the same time makapadayon gihapon ang unit sa ilang mga trabaho," matud pa ni Acting CCPO Director Supt. Melvin Gayotin.
Si Gayotin mitug-an sa Banat News nga gipaabot nalang ang replacement nila ni PO2 Robert Cuyos ug PO1 Leo Batigalao mga sakop sa Vice Control Section ug Drug Enforcement Unit sa CCPO.
Ang duha gisikop sa mga ahente sa NBI-7 atol sa entrapment nga giandam tungod sa reklamo sa managtiayong Francisco ug Dalia Nabua nga sila gipangayuan og P100 mil.
Apan nauyonan lang nga P30 mil lang ang ihatag sa managtiayon ug didto kini buot nga ipahatud nila ni Batigalao ug Cuyos sa gasolinahan sa dalan B. Rodriguez diin usab sila sikopa sa NBI-7.
Matud pa ni Gayotin gikinahanglan nga una pa ilabay ang duruha masiguro daan nga naay ikahulip kanila aron dili mabalda ang mga operasyon sa DEU ug VCS.
Giingong bisan asang dapita mabalhin ang duha basta gawas na sa CCPO basta lang dili makaapekto sa nagpadayong imbestigasyon sa NBI ug sa giandam nga administrative investigation nga gihimo sa CCPO.