Samdan sa iyang liog, tiyan ug kilid sa lawas ang biktimang si Roland Tabuco, taga St.Jude Barangay Bulacao human kini dunggaba sa nag-inusarang pasaherong tulisan dihang siya misukol.
Sumala pa sa biktima gipara siya sa suspek diha sa maong lugar apan nakurat na lang siya dihang wala pa gani makamandar asa mopahatud ang suspek kutsilyo dayon ang gition niini didto sa iyang liog dayong pahibalo nga tulis kadto.
Sa bana-bana sa biktima sa panglawas sa suspek, kayahon ra niya kini sa dumugay maong misukol siya apan nakapanunggab gyud ang gikatahapan dihang sila nag-ilog sa kutsilyo.
Hinuon ang suspek wala makalahutay ug daling mikanaog dayong sirit kaayong mikaratel palayo sa lugar samtang nadala sa Cebu City Medical Center si Tabuco.
DAKPAN. Si PO2 Robert Cuyos ug PO1 Leo Batigalao gitanggong sa buhatan sa NBI human dakping "nangilkil" ngadto sa usa ka magtiayon. -- Paul Jun E. Rosaroso