SPO4 Juanito Pajantoy gitanggong na sa BBRC

Polis nga maoy suspek sa pagkamatay sa iyang kaubang polis ug usa ka tulisan gitanggong na sa Bagong Buhay Rehabilitation Center human gimando sa korte nga bilanggoon subay sa pag-deny sa Ombudsman for the Military sa iyang mosyon nga gisang-at adtong May 16 nga Motion for Reconsideration uban sa motion to Hold Abeyance Filing of Information and Motion to Dismiss.

Si SPO4 Juanito Pajantoy kinsa maoy suspek sa kamatayon sa kauban niining si PO3 Michael Sarcol ug sa napatay usab nga si Omar Patino mipatim-aw kagahapon sa sala ni Judge Ireneo Lee Gako sa RTC Branch 5.

Si Gako sa milabay'ng semana mipauktaba sa paghusay sa gisang-at nga "Motion to Hold in Abeyance"ni Pajantoy tungod sa wala pagtunga niini wala kini mahinayon ug kagahapon lang kini gihusay.

Apan nakugang nalang si Pajantoy dihang migawas usab ang desisyon sa Military Ombudsman nga nag-deny sa iyang mosyon kagahapon hinungdan nga mikumplikar ang paghusay sa mga mosyon diha sa duha ka buhatan.

Tungod sa ka walay hurisdiksyon sa Ombudsman for the Military diha sa RTC-5 diin nasang-at ang kasong "murder" gi-deny sa Ombudsman for the Military ang mosyon ni Pajantoy.

Nunot niini si Gako mimando nga itanggong una si Pajantoy samtang husayon pa usab ang bag-ong gisang-at nga mosyon sa depensa aron makapiyansa karong adlawa.