Kon maka-ginansiya ang Maharlika Investment Fund (MIF), ang mga sakop sa board of directors mahimong mopaburot pag-ayo sa ilang mga suholan, mga benepisyo ug bonuses. Kay exempted sila sa Salary Standardization Law. Gidudahan nga usa ni sa mga rason nga nagharab-harab ang kadagkoan sa financial institusyon sa pag-apil. Mahimong gipasaligon nga mahimong doblehon o triplehon ang dagko nang daan nilang suholan ug allowances karon.
Mahimong mao say hinungdan nga 216 na ka kongresista ang nipirma sa balaudnon. Kay makapalingkod sa ilang mga alyado sa board ug segurong mapiskan sa kabuhong.
* * *
Bisan maalkanse ang MIF, mahimo gihapong mopabaha og bonuses para sa ilang kaugalingon. Kon mapasar ang mga probisyon nga motugot nila sa paglapas sa mga lagda sa ordinaryo nga mga ahensiya ug koporasyon sa gobyerno, way makapugong bisan unsag masud sa ilang bakukang.
Mahimo ra gyod nga mabangkarota ang MIF pero moburot sa makadaghang higayon ang mga bolsa sa mga tagduma. Sa way paghisgot sa paboritong mga negosyante sa administrasyon nga nagpanilap nang daan nga mag-piyesta sa mga transaksiyon nga di para sa nasud kon dili para sa personal nilang kabulanan.
* * *
Ang segurong magbaguod og pas-an sa mga obligasyon, kon simbako mabangkarota ang MIF, mao ang mga magbubuhis. Kay gipamugos sa mga tigpasiugda ang probisyon nga garantisado sa gobyerno ang tanan nilang alkanse ug mga bulilyaso.
Kon sila ang mabulahan bisan unsay mahitabo sa MIF, unsa may insentibo sa pagtarung sa ilang mga trabaho? Kon abagahon sa katawhan ang tanan nilang pataka, unsa may makabadlong nila sa pag-usik-usik sa kuwarta nga di ila?
* * *
Ulug-ulog ra ang mga probisyon nga magsilot sa kalapasan sa ilang mga lagda. Sila ray maghimo sa mga lagda ug di mahitabo nga mounay pagbitay sa ilang kaugalingon. Gawas pa, wa igdungog ang labing dagkong mga opisyal sa administrasyon sa kamatinahuron sa mga balaod.
Nahitabo na ni atol sa diktadura ni Ferdinand Marcos Sr. Sama sa gihimo sa iyang anak nga pagsaad nga paspas nga molambo ang nasud kon matukod ang MIF, nipasalig sab ang amahan og kahiusahan ug kalamboan. Dayong kayabo sa nasudnong ekonomiya. Pait nga nailad sa amahan, mas sakit kon magpatunto na sab sa anak.