TUGUEGARAO CITY, Philippines - Sinalakay at sinunog ng mga rebeldeng New People’s Army ang detachment ng Citizen’s Armed Forces Geographical Unit (Cafgu) sa bahaging liblib na Barangay Masi sa bayan ng Rizal, Cagayan kamakalawa. Bagamat naabo ang buong kampo, sinabi ni Capt. Ramon Padre, tagapagsalita ng 502nd Army Brigade na wala namang nasugatan o nalagas sa panig ng pamahalaan sapagkat walang naabutan ang mga umatakeng rebelde. Ayon kay Padre, nauna nang umalis ang mga sundalo matapos lumipat sa itinayong bagong kampo. Base sa tala, inambus at napatay ng mga rebelde ang limang pulis noong Pebrero 2011 sa bayan ng Rizal. Samantala, noong Abril 2012 naman ay ni-raid ng mga rebelde ang presinto ng pulisya sa bayan ng Allacapan, Cagayan kung saan dinisarmahan ang walong pulis.