CAMP SIMEON OLA, Legazpi City — Brutal na kamatayan ang sinapit ng isang 37-anyos na guro makaraang tadtarin ng saksak ng patalim kamakalawa ng hapon sa loob ng cottage sa Dinos Beach Resort sa Barangay Caricaran, Bacon District, Sorsogon City.
Animo’y kinatay na baboy ang katawan ni Roy Labayandoy ng Barangay Buhatan, Sorsogon East District.
Samantala, sa follow-up operation ng pulisya ay naaresto ang suspek na si Ronnie Gonzales Jr.,19, ng Barangay Macabog, Sorsogon City.
Sa pagsisiyasat ng pulisya, nag-check-in ang mag-lover sa nabanggit na beach resort na may cottage dakong ala-una ng hapon, subalit ilang oras pa lamang ang nakalipas ay lumabas na nag-iisa ang suspek.
Nang dumating ang takdang oras para mag-check-out ay kinatok ito ng ilang roomboy subalit walang sumasagot kaya naisipang buksan.
Bumungad ang duguang katawan ng biktima na nakahiga sa kama. Kaya kaagad na ipinagbigay-alam sa pulisya hanggang sa masakote ang suspek.
Sinisilip ng mga imbestigador ang anggulong selos o pakikipaghiwalay ng suspek sa biktima ang isa sa motibo ng krimen.