Patay na nang idating sa Bay Community Hospital ang biktima na si PO3 Fernando Teodoro Murphy, 45, may-asawa, nakatalaga sa Pila Municipal Police Station sanhi ng tinamong labing-isang tama ng bala sa katawan at ulo.
Ayon sa report, dakong alas-12 ng tanghali ay nagtungo ang mga suspek sa bahay ng biktima at dito ay kanilang nakausap ang ina nitong si Gng. Victoria Teodoro Murphy at nagpakilalang sila ay kasamahan ng kanyang anak.
Pinapasok ni Gng. Murphy ang mga suspek sa loob ng bahay at pagkatapos ay ginising nito ang anak na mahimbing na natutulog.
Naalimpungatan ang biktima at lumabas ng silid at ganoon na lamang ang pagkabigla nito nang siya ay paulanan ng bala ng mga suspek.
Hindi naman ginalaw ng mga suspek ang ina ng biktima at mabilis na tumakas lulan ng isang owner type jeep na walang plaka na ipinarada sa isang kanto. (Ulat ni Ed Amoroso)