MANILA, Philippines — Patay ang isang 71-anyos na lalaki matapos pagtulungang bugbugin ng walong suspek na armado ng baril makaraan siyang dukutin at pagnakawan pa kamakalawa ng hapon sa lungsod ng San Jose Del Monte (SJDM) sa Bulacan.
Namatay habang ginagamot sa ospital ang biktimang si Herminigildo Estonillo, biyudo, ng Brgy. Loma de Gato, Marilao, Bulacan habang nasa kustodiya na ng pulisya ang mga suspek na sina Russel Foronda, 36; Jimmy Hinugin, 43; Jenny Chavez, 43; Madel Adalla, 41; Rowena Rimaldo, 51, at Raquel Dela Cruz, 46. Nakatakas naman ang iba pang suspek na sina alyas Putot at Inday.
Sa report ng SJDM Police Station kay Bulacan Police Director PCol. Relly Arnedo, naganap ang insidente bandang alas-5:25 ng hapon nitong Hunyo 21 sa Kelsey Hills Subd. Brgy. Muzon. Habang naglalakad ang biktima nang pwersahang isakay ng mga suspek sa itim na Mitsubishi Adventure saka binugbog sa loob ng sasakyan.
Sa pagpupumiglas ng biktma, nagawa nitong makatakas at makahingi ng tulong sa isang duty security guard.
Dinala ang biktima sa kalapit na hospital subalit binawian din ng buhay.
Mabilis na nagsagawa ng hot pursuit operation ang pulisya laban sa mga suspek na ikinaaresto ng anim at narekober sa kanila ang mga nakulimbat na mga alahas na nagkakahalaga ng P320,000 at P21,000 cash habang nasamsam din ang cal. 38 na may na apat na bala at improvised handgun (sumpak) na may apat na balang 12 gauge mula sa mga suspek.