CAVITE, Philippines — Pauwi na sana ang isang pamilyang nag-outing sa isang resort subalit nauwi pa ito sa trahedya makaraang malunod ang kanilang kasamang mister na natagpuan sa ilalim ng swimming pool kamakalawa sa Villa Feliciana Resort Indang Cavite.
Hindi na naisalba pa sa pagamutan ang buhay ng biktima na kinilalang si Aeron Toledo Tonyang, 38 anyos, residente ng Brgy. Balubad, Silang, Cavite.
Sa ulat ng pulisya, alas-6:30 ng gabi nang maganap ang insidente kung saan nag-aayos na ng mga gamit ang pamilya ng biktima at pauwi na sana nang mapansin nilang wala ang biktima. Agad nilang hinanap at inakalang nag-CR lamang subalit hindi nila matagpuan hanggang sa makita ito sa ilalim ng swiming pool na may lalim na 5 talampakan.
Agad na isinugod ang biktima sa MV Santiago Medical Clinic subalit hindi na ito naisalba pa.