CAMP JULIAN OLIVAS – Tatlong umano’y notoryus na holdaper ang bumulagta nang puwersahang pumasok sa shop na pag-aari ng isang pulis matapos na pumalag at matapang na nakipagpalitan ng putok ang huli sa Brgy. Ligtasan, Tarlac City kamakalawa ng gabi.
Kasalukuyan nang inaalam ng pulisya ang pagkakakilanlan ng tatlong holdaper na napatay sa barilan.
Sa ulat kay Police Regional Director C/Supt. Aaron Aquino, dakong alas-11:60 ng gabi habang abala sa kanilang shop si SPO2 Rodulfo Villaroman, 51, nakatalaga sa Police Community Precinct 2 ng Tarlac City Police Station kasama ang kanyang misis nang biglang pumasok ang tatlong armadong kalalakihan at nagdeklara ng hold-up.
Dito, agad na umalerto si Villaroman at nakatakbo upang kumubli subalit pinaputukan siya ng tatlong suspek. Nakakita naman ng pagkakataon ang pulis at gumanti ng putok na ikinatimbuwang ng tatlo.
Narekober sa pinangyarihan ng krimen ang mga basyo ng kalibre .9mm at apat na bala nito, isang 1911 US Army caliber .45, magazines, dalawang kutsilyo at isang Yamaha Mio motorcycle na walang plaka.