Para itabla sa 1-1 ang serye
DENVER — Humataw si Gabe Vincent ng 23 points habang may tig-21 markers sina Jimmy Butler at Bam Adebayo para tulungan ang Miami Heat sa 111-108 pagresbak sa Nuggets sa Game Two ng NBA Finals.
Umiskor si Max Strus ng 14 markers tampok ang apat na three-pointers sa first period at may 10 points si Duncan Robinson sa 1-1 pagtabla ng Miami sa kanilang best-of-seven championship series ng Denver.
Nagsalpak ang Eastern Conference champions ng 17-of-35 shooting sa 3-point line kumpara sa 11-of-28 clip ng Western Conference kings.
“We’re not worried about what anybody thinks,” ani Butler. “We’re so focused on what we do well and who we are as a group that at the end of the day, that’s what we fall back on.”
Kumamada si Nikola Jokic ng 41 points para pamunuan ang Nuggets na bigong maduplika ang 103-94 panalo sa Heat sa Game One.
“Our guys are competitors,” sabi ni Heat Fil-American head coach Erik Spoelstra. “They love these kind of moments.”
Matapos ang mintis na triple ni Butler para sa Miami ay bigo naman si Jamal Murray na maipasok ang kanyang tres sa huling posesyon ng Denver sa pagtunog ng final buzzer.
Tumapos si Murray na may 18 points at 10 assists para sa Nuggets at may 12 at 11 markers sina Aaron Gordon at Bruce Brown, ayon sa pagkakasunod.
Nakatakda ang Game Three sa Huwebes (Manila time) sa homecourt ng Heat.