Laro Ngayon
(FilOil Flying V Center)
2 p.m. PH team vs Cocolife
4:15 p.m. Petron vs UP-UAI
7 p.m. UE-Cherrylume vs Sta. Lucia
MANILA, Philippines — Hangad ng Petron Blaze ang ikalawang sunod na panalo sa kanilang pakikipaglaban kontra sa University of the Philippines-UAI habang haharapin ng national women’s team ang Cocolife ngayon sa pagpatuloy sa 2018 Philippine Superliga Invitational Conference sa FilOil Flying V Center sa San Juan City.
Kung magwagi ang Blaze Spikers laban sa Lady Fighting Maroons sa alas-4:15 ng hapon aakyat sila sa sosyohan sa liderato sa Pool A habang importante naman sa Sta. Lucia Lady Realtors at UE-Cherrylume ang manalo sa kanilang pagtatagpo sa alas-7 ng gabi para manatili ang pag-asang pumasok sa susunod na round.
Ito pa ang unang pagkakataon na magpapakita ng husay ang Philippine national women’s team sa kanilang pagtatagpo laban sa Cocolife Asset Managers sa non-bearing game sa alas-2 ng hapon.
Asahan na ang mainit na hatawan ng UE-Cherrylume at Sta. Lucia dahil ang sinumang mabigo sa dalawa ang malalagay sa komplikadong katayuan.