MANILA, Philippines - Mula sa isang five-game losing slump, bumangon ang Gin Kings upang magposte ng isang four-game winning streak at buhayin ang kanilang tsansa sa quarterfinal round ng 2012-2013 PBA Philippine Cup.
Puntirya ang kanilang pang limang sunod na panalo at ang silya sa quarterfinals, sasagupain ng Barangay Ginebra San Miguel ang Air21 ngayong alas-6:30 ng gabi matapos ang salpukan ng Meralco at Barako Bull sa alas-4:15 ng hapon sa Smart Araneta Coliseum.
Nanggaling ang Gin Kings sa dramatikong come-from-behind 97-90 win laban sa Rain or Shine Elasto Painters noong nakaraang linggo.
Sa naturang panalo, bumangon ang Ginebra mula sa isang 18-point deficit bukod pa ang pagbabangko kay Most Valuable Player Mark Caguioa sa fourth quarter.
“We were even debating on it with the coaching staff. Kumbaga kasi sa giyera, gusto mo makasama mo s’ya sa foxhole kahit ano mangyari. Pero kasi, sa whole game nag-struggle eh, so we said, sige tingnan namin, and it turned out to be a blessing,” ani coach Siot Tanquingcen kay Caguioa.
Kasalukuyang bitbit ng nagdedepensang Talk ‘N Text ang 11-2 record kung saan nila ganap nang nakamit ang isa sa dalawang ‘twice-to-beat’ incentive sa quarterfinals kasunod ang San Mig Coffee (8-3), Rain or Shine (8-4), Ginebra (6-5), Alaska (6-6), Meralco (6-6), Petron Blaze (6-7), Air21 (4-8), Barako Bull (3-8) at Globalport (1-10).
Maliban sa Tropang Texters, opisyal na ring umabante sa quarters ang Mixers at Elasto Painters.
Nakalasap naman ang Express, dating nagtala ng isang three-game winning run, sa isang 94-100 kabiguan sa Texters noong Nov. 25.