MANILA, Philippines — Opisyal nang idineklara ang buong lalawigan ng Rizal na malaya sa mga rebeldeng komunista kasunod ng pinakahuling ceremonial proclamation ng Stable Internal Peace and Security (SIPS) status sa Antipolo City, Rizal nitong Lunes.
Sinabi ni Lt. Col. Jeffrex Molina, hepe ng 2nd Infantry Jungle Fighter Division na ang lalawigan ng Rizal ay idineklara nang Malaya sa terorismo at karahasan ng NPA rebels matapos naman ang ceremonial proclamation nito bilang Stable Internal Peace and Security (SIPS) status sa ginanap na ceremonial proclamation sa Antipolo City kamakalawa.
Ang makasaysayang event ay ginanap Rizal Provincial Capitol Complex sa pamumuno ni Rizal Governor Nina Ricci Ynares na dinaluhan ng iba pang opisyal ng gobyerno kabilang sina National Security Council Adviser Sec. Eduardo Año, DILG Region IV-A director Ariel Iglesia, League of Mayors president Cesar Ynares.
Dumalo rin sa okasyon sina Southern Luzon Command (SOLCOM) commander Lt. Gen. Facundo Palafox IV, Southern Luzon Area Police Command Commander PLt. Gen. Jonnel Estomo, 2nd Infantry “Jungle Fighter” Division (2ID) commander Brig. Gen. Cerilo Balaoro Jr., 202nd Infantry “Unifier” Brigade Officer-in-Charge (202Bde) Col. Jess Alcudia at 80th Infantry “Steadfast” Battalion (80IB) commander Lt. Col. Mark Anthony Ruby.
Pinangunahan naman nina Palafox IV, 2nd Infantry “Jungle Fighter” Division (2ID) Commander Brig. Gen. Cerilo Balaoro Jr. at nasabing mga opisyal ng lokal na pamahalaan, pulisya, at iba pang stakeholder ang paglalagda ng memorandum of understanding (MOU) na nagdedeklara ng matatag na panloob na kapayapaan at seguridad na ginanap sa Rizal Provincial Capitol Complex.