MANILA,Philippines — Patay ang isang hinihinalang palaboy makaraang tumalon buhat sa riles ng Metro Rail Transit sa pagitan ng Ayala at Buendia sa Makati City kahapon ng hapon.
Inisyal na nakilala ang nasawi na si Mas-Ud Sandamoin, tinatayang nasa edad 21-anyos, tubong Marang, Sumisip, Basilan.
Sa ulat ng pulisya, ala-1:30 ng hapon nang tumalon ang biktima buhat sa itaas ng southbound lane ng MRT sa pagitan ng Ayala at Buendia Avenue Stations na may taas na 20 talampakan.
Napilitan naman ang MRT-3 na limitahan ang kanilang operasyon mula North Avenue hanggang Shaw Blvd. station at naibalik sa normal pagsapit ng alas-2:47 ng hapon.
Nagsasagawa naman ng imbestigasyon ang pulisya upang matiyak na walang naganap na foul play sa insidente.