MANILA, Philippines - Kalunus-lunos na kamatayan ang sinapit ng isang 20-anyos na ginang na isang pipi at bingi makaraang gilitan sa leeg at isiksik sa isang sako ng kanyang live-in partner, kamakalawa ng gabi sa Caloocan City.
Nakilala ang nasawi na si Mary Joy Rodriguez, ng Magnolia Street, Barrio San Lazaro, Brgy. Tala, ng naturang lungsod. Kusang-loob namang sumuko sa pulisya ang suspek na si Reynaldo Anova, 21-anyos.
Sa ulat ng Caloocan City Police, nadiskubre ang bangkay ng biktima dakong alas-11 kamakalawa ng gabi. Unang nagsumbong ang ina ng biktima sa mga opisyal ng barangay dahil sa hindi nito makita ang anak na babae kaya rumesponde sa lugar at nakita ang bangkay ni Rodriguez.
Sa imbestigasyon, nabatid na unang nagkaroon ng away sina Anova at kinakasama na si Rodriguez kamakalawa ng gabi. Nakakuha umano ng itak ang biktima at tinangkang tagain ang suspek na nagawang makailag at maagaw ang gulok.
Ang naturang itak rin ang ginamit ng suspek sa paggilit sa leeg ng biktima. Dito isinilid ng suspek ang bangkay ng biktima sa isang sako at inilagay sa ilalim ng hagdan ng kanilang bahay. Ayon sa pulisya, umamin sa kanyang krimen ang suspek habang narekober rin ang bolo na ginamit nito sa krimen.