MANILA, Philippines — Inaprubahan na sa ikalawang pagbasa ang Absolute Divorce Bill sa plenaryo ng Kamara nitong Miyerkules ng gabi.
Sa pamamagitan ng viva voce voting ay pinagtibay ang House Bill (HB) 9349 o Absolute Divorce Act.
Tinukoy naman na kabilang sa mga grounds para ipatupad ang absolute divorce ay ang psychological incapacity, marital abuse, kapag ang isa sa mga magka-partner sy sumailalim sa surgery para magpalit ng kasarian, pagkakahiwalay ng 5 taon, pisikal na pang-aabuso, pagkakahiwalay ng 5 taon, pagtataksil, homosexuality at iba pa.
Sa plenaryo, kinuwestiyon ni Tingog Partylist Rep. Jude Acidre kung ang absolute ay para sa mag-asawang hindi na masayang nagsasama sa kabila ng kasal ang mga ito.
Tinugon naman ni Albay 1st District Rep. Edcel Lagman na hindi lamang sa hindi masayang pagsasama kundi maging sa mga toxic na relasyon at puno ng pighating sitwasyon.
Binigyang diin ni Lagman, may-akda ng panukala na ang absolute divorce ay “pro-poor woman” kung saan sa ilalim ng panukalang batas ay may mandato rito ang hukom na desisyunan ang petisyon ng diborsiyo sa loob ng isang taon matapos namang mag- expire na ang 60 araw na ‘cooling off period’.