Baha sa Buendia abot sa Ayala
kaya gayon na lang ang aking pangamba
Na hindi darating ang mahal kong sinta
sa aming usapang doon magkikita!
Hindi humihinto ang patak ng ulan
kaya basa na rin paa ko’t katawan;
Baha na sa Buendia walang madaluyan
kaya tumataas tubig sa lansangan!
Dahil sa mahal ko ang mutyang ka-date
sa pagkakatayo’y hindi umaalis;
Siya ay dumating sa aki’y kumapit
at naglakad kami sa kalyeng maputik!
Nakasapit kami sa aming tahanan
kahit kapwa basa maligaya naman;
Yaon ay panahong kami’y bagong kasal
sa Greenbelt Chapel kami’y nagdarasal!