Eto na ha, ilang araw na lang talaga at papasok na ang buwan ng Disyembre, amoy na amoy na talaga ang holiday season.
Sa ganitong panahon mas lalong dapat na magpatupad nang matinding pagbabantay at seguridad ang ating kapulisan.
Pihadong nagsisimula nang magplano ang mga kawatan at sasalakay na naman anumang oras.
Panahon na naman na kanilang pagpuntirya sa mga pinaghihirapang kabuhayan ng ating mga kababayan.
Marahil kailangang palakasin na ngayon pa lamang ang police visibility at kung maaari nga dapat na magpakalat na rin ng mga naka-sibilyang pulis na magbabantay sa mga sasalakay na masasamang-loob.
Ingat kayo dahil sa ganitong panahon marami rin ang lulutang na mga manloloko, dorobo at mga magsasamantala .
Yung iba rekta kung kumana, yung iba naman hindi halata nananamantala talaga.
Maraming mukha ang mga ito kaya dapat marunong tayong bumasa sa kanilang modus.
Mahirap na, baka mawala ang pinaghirapan ninyo para sa pamilya ninyo.
Kaya nga laging maging alerto.