MANILA, Philippines — Limang katao ang nasawi kabilang ang apat na menor de edad sa halos isang oras na sunog na tumupok sa kanilang bahay sa Navotas City, kahapon ng umaga.
Ang mga nasawi ay kinilalang sina Sarah Constantino, 41; kanyang anak na si Xylem Lorraine Constantino, 17, senior high, pinsan na si Ruthie Tongco, 11, Grade 6; at magkapatid na sina Daniella, 13, Grade 8; at Kayla Jocson, 12, Grade 6.
Sa ulat ng Bureau of Fire Protection(BFP), alas-7:14 ng umaga nang magsimula ang sunog sa tahanan ng mga biktima na matatagpuan sa kahabaan ng Gov. Pascual St., malapit sa Brgy. Hall ng Brgy. San Roque ng lungsod.
Mabilis na kumalat ang apoy sa tahanan ng mga biktima na gawa sa mahihinang uri ng materyales at idineklarang under control ang sunog alas-7:42 ng umaga at tuluyang naapula, alas-7:53 ng umaga.
Tumambad sa mga nagrespondeng bumbero ang walang malay na katawan ng mga biktima sa loob ng naturang bahay kaya kaagad silang isinugod sa Navotas City Hospital pero idineklarang dead on arrival dahil sa ‘smoke inhalation’.
Patuloy naman ang isinasagawang imbestigasyon ng mga awtoridad upang alamin ang pinagmulan ng sunog.