MANILA, Philippines — Nagbabala si Philippine National Police (PNP) chief PGen. Rommel Francisco Marbil na mapapatawan ng disciplinary action ang mga pulis na mapapatunayang protektor ng operasyon ng illegal POGOs (Philippine Offshore Gaming Operators) sa bansa kasunod ng pagkakadiskubre ng mga POGO hubs sa Region 3.
Ayon kay Marbil, hindi dapat nasasangkot ang mga pulis sa anumang illegal activities.
“Integrity and accountability are the cornerstones of our public service. We remain committed to ensuring that our officers uphold these values,” ani Marbil.
Aniya, pinaigting nila ang kanilang monitoring at kampanya laban sa illegal POGOs na nagresulta ng matagumpay na police operations sa Bamban, Tarlac at Porac, Pampanga.
Matatandaang pinangunahan ng Criminal Investigation and Detection Group (CIDG) at Anti-Cybercrime Group (ACG) ang operasyon upang buwagin ang naglipanang POGO operations sa bansa.
Dagdag pa ni Marbil, minomonitor na rin nila ang iba pang mga probinsiya na mga operasyon ng POGO.