MANILA, Philippines - Nasawi ang dalawang sundalo nang tambangan ng mga armadong kalalakihan na pinaghihinalaang miyembro ng mga bandidong Abu Sayyaf Group (ASG) kamakalawa sa bisinidad ng Brgy. Latih, Patikul, Sulu.
Ang mga nasawing sundalo ay kinilalang sina Pfc. Bryan Sayson ng Kapatagan, Lanao del Norte at Pfc. Rey Lucasan ng Tambulig, Zamboanga del Sur na pawang miyembro ng Charlie Company ng Army’s 35th Infantry Battalion (IB) na nakatalaga sa Latih Detachment sa lugar.
Batay sa ulat, dakong alas-5:00 ng hapon ay nakasibilyan ang dalawang sundalo na lulan ng motorsiklo at pabalik na sa detachment nang sila ay pagbabarilin.
Nagsagawa ng reinforcement operations ang tropa ng mga sundalo at nakasagupa ang mga bandido na tumagal ng limang minuto kung saan narekober sa lugar ng bakbakan ang isang COLT M16 rifle, isang cal 30 automatic rifle at isang cellphone.