Dalagita ni-rape/slay ng obrero

MANILA, Philippines - Isang 12-anyos na da­lagita ang walang awang gi­nahasa at pinatay ng isang construction worker kamakailan sa Mun­tinlupa City.

Ang biktima ay nakila­lang si Stephanie Cristel, ng 207 T. Molina St., ng lungsod.

Naaresto naman ang suspek sa isang fol­low-up operation na nakilalang si Reynante Odono, 26, na naninirahan sa 7-A Extension Ilaya St., Ba­rangay Alabang ng lungsod matapos itong ituro ng isang testigo. Kinasuhan na ito ng murder at rape.

Batay sa imbesti­gas­yon, noong Biyernes ng alas-3:30 ng madaling-araw nang matagpuan ang bangkay ng dalagita sa ikalawang palapag ng ginagawang gusali malapit lamang sa kani­lang bahay.

Bago ito, pinasok ng suspek dakong alas-3:00 ng madaling-araw ang bahay ng biktima na noon ay mahimbing na natutulog sa unang pa­lapag ng kanilang bahay habang natutulog sa ikalawang palapag ang kanyang mga magulang.

Binuhat ng suspek ang dalagita patungo sa gi­na­­gawang gusali at dito isinagawa ang pang­haha­lay.

Nang manlaban ang biktima ay sinakal siya ng suspek hanggang sa mamatay.

Nabatid pa narinig ng tiyahin ng biktima na si Alma Elba ang pag­sigaw ng pamangkin kaya’t gi­nising niya ang ama upang hanapin ito.

Natagpuan naman ni Ronald ang anak na gu­lagulanit na ang damit at wala ng malay kaya’t mabilis nilang isinugod sa Alabang Medical Cen­­ter subalit idi­neklarang dead-on-arrival ito.

Kaagad na nadakip ang suspek matapos lumutang ang isang testigo na na­kakita dito na karga ang dalagita na una niyang inakala na bagahe ito.