Kinakapos sa pera ang aktor na produkto ng reality contest kaya naman kung minsan eh nasisira sa kausap pagdating sa pera.
Managing his own na ang aktor dahil gusto niyang mapunta sa kanya ang buong talent fee kesa sa dati niyang manager.
Nagagawa na ring mag-booking ng aktor. Dagdag kita kumbaga dahil bihira rin ang trabahong dumating sa kanya.
‘Yun nga lang, sumabit minsan ang aktor pagdating sa pera. Sa isang show na nakuha niya para sa isang singer, nagawa na niyang ibigay ang down payment sa singer.
Pero nang matapos ang commitment ng singer, idinahilan ng aktor na sa kanya nakapangalan ang tseke para sa full payment sa singer.
Pero matapos ang ilang araw na naniningil na ang singer sa balance niyang TF, hindi na mahagilap ang aktor, huh! Ni ha, ni ho, walang pasabi sa buong kabayaran ng singer!
Ilang linggo ang lumipas bago naibigay ni aktor ang balanse sa singer na parang walang nangyari!
Tumahimik na lang ang singer pero sa isip-isip niya, hindi na siya papayag kunin ng aktor nang hindi bayad nang buo bago mag-perform!
Wendell, takot maubos ang ipon sa pulitika!
Alanganin pa rin ang aktor na si Wendell Ramos na pasukin ang pulitika sa Maynila. Eh inspirasyon ni Wendell sa larangang ito ang co-artists niya sa namayapang si Douglas Quijano na sina Joey Marquez, Richard Gomez at Anjo Yllana.
Sa guesting ni Wendell sa Marites University na abangan ninyo, alanganin pa rin siyang tumakbo bilang konsehal sa Maynila. Pero bago pa man niya naisip pumasok sa pulitika, nakakatulong na siya sa seniors na kailangan ang operasyon sa mata. Meron siyang team ng doctors sa isang ospital na nagsasagawa ng operasyon.
‘Yun nga lang, nang decided na si Wendell na pasukin ang pulitika, kumpleto na ang line-up ng konsehal ng magkabilang panig na sina Isko Moreno at Sam Verzosa.
Naisip ni Wendell na tumakbong independent. Pero naisip niya na ayaw niyang mawala ang perang naipon para sa pamilya.
Eh bago tuluyang magdesisyon, panoorin muna si Wendell sa Metro Manila Film Festival movie na Green Bones kasama sina Dennis Trillo at Ruru Madrid.
Abangan din sa Marites Unversity ang kabuuan ng interview namin kay Wendell.