ASTANA, Kazakhstan-- Umiskor ng malaking panalo si light bantamweight Eumir Felix Marcial para pumasok sa gold medal round ng AIBA Junior World Boxing Championship dito sa Kazakhstan Sports Palace.
Pinabagsak ng 15-anyos na pambato ng Zamboanga si Vaha Eduard ng Belarus sa opening round ng kanilang semifinal encounter sa men’s 52-kilogram division.
Nakatiyak na ng silver medal, pipilitin ni Marcial na makuha ang gold medal sa kanilang laban ni Cengiz Onat ng Turkey.
Hangad rin ni Marcial na maging kauna-unahang Filipino na nakakuha ng gintong medalya sa nasabing event matapos ilunsad noong 2001.
Binigo naman ni Onat si Sang Myeong Hang ng Korea, 17-10, sa semis.
Pinabagsak ni Marcial si Eduard mula sa isang right hook patungo sa kanyang tagumpay.
Nakabangon pa si Eduard matapos ang mandatory eight count bago pinigil ng referee ang laban sa 1:22 mark.
Sa 48 bansang lumahok sa nasabing major event, 15 rito ang nakapagpapasok ng kanilang mga boksingero sa finals.
Sa 15 bansa, 12 fighters ay galing sa Asya, habang ang 12 ay mula sa Europe.