CEBU, Philippines - Gidemolis sa LLBA Team-A ang kontrang BSBA, 80-53 sa LLBA Rollway Friendly Inter-club basketball tournament diha sa Agus gym sa Lapu-Lapu City.
Wala kapugngi si Uriel Manilag sa maong duwa diin mirehistro kini'g 23 puntos aron pangulohan ang LLBA Team-A nga nidominar sa kinatibuk-ang duwa.
Gawas ni Manilag, sila si Archie Ompad ug Tata Bardago mirehistro sab og double figures. Si Ompad midiga og 14 puntos, samtang si Bardago mihirit og 12 puntos.
Ang pilderong BSBA gipangulohan ni Dindo dela Rama pinaagi sa iyang 13 puntos.
Sa sayo pa, ang Radaza Boys mikulit sab og daog batok sa LLBA-VKK/Solmeat ni team owners Leo Bascon ug Victor Malingin sa iskor nga 87-83. (BANATSPORTS)