MANILA, Philippines - Matapos angkinin ang bakanteng International Boxing Association (IBA) female super bantamweight title, target naman ni Ana "The Hurricane" Julaton ang World Boxing Organization (WBO) World Championship.
Nakatakdang lumaban si Julaton sa Disyembre 4 sa HP Pavilion sa San Jose, California para sa WBO World super bantamweight title.
"I'm very eager to have the chance to fight for the WBO World Championship," wika ng 29-anyos na Fil-American fighter. "I promise I will fight my heart out for the fans."
Tinalo ni Julaton si American Kelsey Jeffries via majority decision noong Setyembre 12 para sa bakanteng IBA female super bantamweight belt sa tulong ni Filipino trainer Nonito Mang Dodong" Donaire, Sr.
Kasalukuyang ibinabandera ni Julaton ang kanyang 5-1-1 win-loss-draw ring record kasama ang 1 KO.
Hinihintay ni Julaton ang pagdating ni Donaire, ama ni world flyweight champion Nonito "The Filipino Flash" Donaire, Jr., sa United States para simulan ang kanilang paghahanda.
“I believe in his training and his system," ani Julaton. “The way I see it is if my win over Kelsey Jeffries, one of the greatest female 122lb World Champions in the History of the sport was that low of a grade then I can't wait until I get an A+.”
Ang 33-anyos na si Jeffries (41-10-1, 4 KOs) ang female world featherweight titlist. (Russell Cadayona)