CEBU - Si world heavyweight champion Nikolai Valuev modepensa sa iyang WBA title batok sa kampiyon kanhi Evander Holyfield karong Disyembre 20 didto sa Zurich.
Mao kini ang gipahibalo sa iyang promoter niadtong miaging adlaw.
Masaligon ang 35-anyos nga si Valuev nga modaog batok sa 46-anyos nga si Holyfield, kinsa nangandoy nga mamahimong world champion sa ikalimang higayon.
Naglaraw si Valuev nga mobalik ngadto sa Switzerland human gipaundang si Jameel McCline sa ikatulong round niadtong Enero sa miaging tuig didto sa Basle.
Ang engkuwentro mahitabo didto sa Hallenstadion sa Zurich diin si Muhammad Ali mipasurender ni German heavyweight Jurgen Blin sa ikapitong hugna human sa ilang panagtagbo niadtong 1971.
Ang four-time heavyweight champion nga si Holyfield nagbitbit og 42-9, 27KOs, samtang si Holyfield adunay 49-1, 34KOs.
Si Holyfield gitangtangan sa iyang world title niadtong 2000 ug wala na makabalik og away sukad napilde ngadto ni Sultan Ibragimov sa miaging tuig didto sa Moscow, samtang si Valuev milangkat og balik sa WBA title dihang iyang gipilde si John Ruiz niadtong Agosto ning tuiga didto sa Berlin. –BANAT NEWS