Ang walhon nga offguard nga si Harlow Chad Villanil mipasulod og duha ka krusyal nga three-point shots sa tunga-tungang bahin sa fourth period aron pagluwas sa seven-time champion University of the Visayas (UV) Green Lancers batok sa Don Bosco Technology Center (DBTC) aron pag-iskor og 76-66 nga kadaugan sa miaging gabii sa nagpadayon nga Cebu Schools Athletic Foundation, Inc. (CESAFI) diha sa Cebu Coliseum.Karong gabii, suwayan sa University of San Jose Recoletos (USJR) Jaguars ang paglugway sa ilang liderato alang sa ilang ika-upat nga daug atol sa ilang pakigsangka batok sa University of San Carlos (USC) Warriors nga gipangulohan sa ilang “boy next door appeal” nga si John Emel Rowe.
Ang Jaguars buot magpabilin sa solong liderato bisan pa sa ilang makuyaw nga kasinatian sa miaging gabii dihang naglisod sila pagpukan sa Cebu Institute of Technology (CIT) Wildcats una sila makaginhawa’g lawom sa ilang 72-64 nga kadaugan.
Ang duha ka triples ni Villanil maoy nagduso sa Lancers ngadto sa unahan gikan sa sikit nga 62-60 ngadto na sa 68-60 ug laing tulo ka puntos ni Von Harry Lanete human sa pipila ka possession, maoy naghatag sa Lancers sa ilang pinakadaku nga labaw nga 14 puntos, 74-60 kapin na lang sa duha ka minutos ang nahibiling oras sa duwa.
Wala unta mo-surrender ang Greywolves apan tungod kay wala na sila’y ikasustenir, napandol na sila didto sa unahan ug wala na makabangon.
Kataposan nilang paglabaw mao ang 51-50 nga iskor human sa tira ni Celso Colegado Jr. apan human niadto, gikuyapan na sila human lang makakuha’g 43-36 nga abante.
Human matabla ni Lanete sa 43-all pinaagi sa ilang 7-0 run, wala na manumbaling pa ang Lancers nga nahimutang na karon sa ikaduhang pwesto uban sa ilang opening day conquerors nga Warriors sa parehong 2-1 nga baraha.
Ang Warriors hinuon aduna’y kahigayonan nga mo-abante pag-usab atol sa ilang pakigsangka batok sa Jaguars kinsa nag-agi una’g kulba sa wala pa nila pildeha ang CIT Wildcats, 72-64 sa miaging gabii.
Kung mao gihapon ang ipakita nga duwa sa Jaguars, hayan maglisod sila pagpukan sa Warriors.
Si Gregory Slaughter maoy nangu sa Lancers sa iyang 22 puntos, 12 ka rebounds ug walo ka blockshots.
Si Lanete may 17 puntos, si Villanil mitampo og 14 puntos ug si Junjun Lasala may 11 puntos.
Ang beteranong si Ricmar Perturbos nga kanhi player sa Perpetual Altas, maoy nangu sa Greywolves sa iyang 18 puntos ug si Colegado may 16 puntos.
Puntos kada usa:
UV (Srs.) 76—Slaughter 22, Lanete 17, Villanil 14, Lasala 11, Dennison 6, Cincoflores 3, Silva
DBTC (Srs.) 66— Perturbos 18, Colegado 16, Delos Santos 11, Aldave 6, Dela Rama 4, Quijano 4, Villaver 3, Lumapas 2, Tecson 2