Usa ka surprise drug test ang gihimo sa rehiyonal nga buhatan sa Bureau of Fire Protection niadtong Agosto 28, 2012 diin gipangulohan sa among Regional Director SR. SUPT. MA. LUISA C HADJULA. Miabot dul-an 300 ka mga BFP personnel, non-commissioned officers, non-uniformed personnel ug tanang provincial, city ug municipal fire marshal lukop Central Visayas gipatambong ug misumitir sa ilang urine sample alang sa maong drug test.
Gituyo kini aron masuta kun duna ba'y sakop sa atong kabomberohan nga tigamitan og ilegal nga drugas. Ang pagpahigayon sa maong drug test nagsubay sa mga lagda sa Civil Service Commission aron masiguro nga ang tanang kawani sa gobiyerno wala mag apil-apil sa maong bisyo.
Apan ang nakaparat sa maong random drug test, dunay lima ka BFP personnel ang nagpositibo sa gihimong initial screening sa urine sample. Dili ko ikabutyag ang mga pangalan sa mipositibo sanglit kinahanglan pa man kadtong ikompirmar sa kaulohan.
Sa akong nahibaw-an sa atong pagsukitsukit posible diay nga magpositibo kita sa drug test bisan og wala kita magamit og ilegal nga drugas kini kun duna kita'y natomar nga medisina, bitamina, bino nga nainom ug uban pa.
Alang sa kasayuran sa publiko, duna'y CSC Circular 13-10 diin naghatag kini og kamandoan nga nag-ingong: “heads of agencies shall ensure that the drug-free workplace program on the prevention and control of dangerous drugs, including drug testing, shall be disseminated to all officials and employees.”
Ug maoy rason nga among gihimo ang kinalit nga drug test subay sa maong circular. Ang nakadimalas lang sa nagpositbo matud pa sa akong nahisgutang circular nga: “It should be emphasized that any official or employee found positive for use of dangerous drugs shall be subjected to disciplinary/administrative proceedings with a penalty of dismissal from the service at first offense pursuant to Section 46 (19) of Book V of Executive Order 292 and Section 22 (c) of its Omnibus Rules. Sa ato pa, kun human sa confirmatory test masuta gyud nga positibo kining migamit og illegal nga drugas mataktak gyud sila sa serbisyo. Kaniadto, ipa-rehabilitate ra ang masakpan.
Ang bag-ong circular sa CSC mas daling makapatangtang sa mga badlungon sa gobiyerno. Ang usa ka empleyado sa gobiyerno kinahanglang kasaligan ug modelo sa katilingban.