Usa ka dakong risgo ang gihimo sa mga unang sumosunod ni Cristo diha sa ilang pagbiya sa ilang naandang panginabuhi sa panagat. Sama ra nga gisugal nila ang ilang kaugmaon diha sa ilang pagtaak sa bag-ong matang sa pagkinabuhi nga dili nila sinati. Apan lagi kay gitawag, mao nga sila misunod ug mihimo sa maong pagsugal.
Diha sa pagsunod sa kabubut-on sa Dios mahinungdanon ang pagtahan sa kaugalingon sa paagi nga linangkob. Uban niini ang masaligong pag-angkla sa kaugalingon ngadto sa Diosnong Probidensiya nga bisan unsay mahitabo dili ug dili gyud ikaw mapasagdan sa Dios. Dili tuod sayon apan mahimo kini sa gihapon.