Lain na usab nga sakop sa atong militar ang napatay sa bandidong Abu Sayyaf. Ang nakasakit kay gawas nga sila gipatay, gipangputlan pa gayod ang uban kanila sa ilang ulo.
Dili kini ang una nga gipangputlan sa ilang mga ulo ang mga sundawo sa atong gobyerno ning bandidong grupong Abu Sayyaf.
Tungod sa hitabo gimando karon ni Pangulong Noynoy Aquino ang paglutos sa mga bandido ug ang puhag kanila.
Mao lagi ni ang nakadaut sa liderato sa atong gobyerno kay unya pa mangita ug maningkamot paglutos sa mga dautang elemento sa katilingban kun nakahimo na usab kini og kadaut sa mga butang ug kinabuhi.
Sa dihang unang nanglunggo og katorse ka ulo sa mga sundawong marines ang Abu Sayyaf gipangita ug gigukod sila sa militar apan wa gyod sila madakpi ug labaw na nga wa gyod mabungkag ang maong grupo maong nagduda na ako karon sa katakos sa atong militar sa pagpanalipod sa iyang katawhan.
Sa kadugay’ng panahon nga gisigihan sa paggukod sa atong militar ang Abu Sayyaf wa gyod ni sila mapuo hinuon misamot pa ka ngilngig ang ilang kalihokan nga daw giduwaduwaan lang ang atong militar. Unsa may buot ipasabot niini, nga mas utokan pa ang Abu Sayyaf kay sa atong militar?
Ang intelligence sa atong militar naglihok ba o natulog lang sa pansitan. Ang pundo para sa intelligence gathering nagamit ba sa pagpangita sa Abu Sayyaf ug ubang dautang elemento sa atong katilingban? Mipaingon gyod kaha sa intelligence sa militar ang intelligence funds o gisakiyo lang ra upod sa mga heneral.
Laraw gyod upod kaha sa atong mga top ranking officials sa militar ang paglutos sa Abu Sayyaf o gidrama lang nila ang katawhan ug ang mismo nilang mga ginsakpan?