ENERO 2, 2011: Ang Epipaniya sa Ginoo
Mga Pagbasa: Is. 60;1-6/Sal,. 72/Ef. 3; 2-3a/Mt. 2;1-12
PASIUNA
Adunay negatibong konteksto ang terminong mago o pamago alang sa mga sugarol sa sabong dinhi sa ato. Kay lagi ila man kining gilambigit sa minarunong nga akto sa pagpanikas. Apan ang mga “mago” gikan sa pulong Griyego nga Magi nga nagpasabot og maalamon. Hinuon wala gitino kun si kinsa gyud kining mga mago apan dili pangutana kun may ngalan ba sila o wala ang mahinungdanon mao nga ning Domingoha, ilang gipakita ang sanglitanan sa pagkamanggihatagon diha sa paghatag nila sa ilang mga gasa nga Bulawan, Insenso ug Mira. Dugang pa, ang maong panagtagbo maoy timailhan nga ang Dios alang gyud sa tanang mga kaliwatan.
PAGPALAWOM
Ang mga gasa nga gihatag sa mga Mago o maalamon ang dili nato pagatimbangon ginamit ang mga kalibutanong bili. Ang mga gasang bulawan, insenso ug mira, mga simbolo sa kinaiya ug tahas sa maong Emanuel nga gihalaran. Ang Bulawan simbolo sa iyang harianong kagikan. Ang Insenso ang nagsimbolo sa iyang parianong pagkinabuhi nga nagasukad sa kinabuhing maampuon. Ang katilingbanong ministeryo sa atong Ginoong Jesus ang nakasentro gyud diha sa kinabuhi sa pag-ampo ug pakigsuod sa iyang amahan nga suod niya. Ang Mira, nagsimbolo usab sa kapaitan nga linugdangan sa maong akto sa paghigugma sa kabubut-on sa iyang amahan nga anaa sa langit. Ang pinakamaanindot nga gasa nga gihatag sa mga mago ngadto sa atong Ginoo mao ang ilang hilom nga pagbiya sa eksena. Gihimo nilang sentro ang gigasahan ug dili ang ilang kaugalingon….
Implikasyon niini sa atong inadlaw ug Kristohanong pagkinabuhi
Ning tuig 2011, mahinungdanon nga atong pamalandongan kining mosunod nga mga punto:
1. Ang Dios dili alang lamang sa pipila kondili alang sa tanan. Busa angayan lamang nga dili kita mamahimong Katoliko Sirado diha sa atong pakiglambigit sa ubang sakop sa laing denominasyon.
2. Nga sama sa mga mago, mohatag unta kita diha sa kahilom apan kinasingkasing nga paghatag.